On l'attendais le Slam de Youri qui participe aux sessions Slam depuis la n°0, la version Test!! Son texte sur la Pointe vous a plu alors... le voici! Laissez vos impressions!

La Pwent, la Pwent sé la Pwent
(yo di ) la Pwent sé on gangsta, la pwent sé on mafia
Sé la yo ka van krak la sé la yo té ka bwè tafia (sa vwé)
Sé la yo ka désan rum la sé la yo ka fimé sensimilia (sa vwé)
La Pwent kisisi, la Pwent kisisa
La Pwent sé kon tout koté i ni lé bon lé brit é lé trian
Téren d’expérimantasyon pou teknik datak toni trian
Sé diféran kalité san menm konté débouya é entrépid (sa vwé osi)
Pa enki moun a mové labitid mové latitid
La Pwent sé la jwa, la Pwent sé la gété,
« Noël, noël, je vois l’étoile du Berger »
Sé la nou ka kouri karnaval,
sé la nou ka fè brilé vaval
« Ban mwen on bòkit o poulé avè on vaval panplemous » (yò)
La Pwent sé plen frimous toujou ni plen ti moun an la ri la
Ki apran trè to pa pé pon moun, respecté tout moun,
gadé tout moun an zyé, é si yo dis, sé an koukoun
é sé la Pwent ki toujou la, an pwent a mouveman la
sé li ki ni feeling la ki ka lansé sé mod la
la Pwent émé lò, la Pwent sé bijou an lò,
la Pwent sé zanno an lò, chiviyè, chivé an lò
dantist ka fin bijoutyè a fos yo fè dé dan an « tching » !
an gwadloup tout moun enmé lò, sé pa enki la Pwent ki bling !
pas lò la sé listwa an nou é listwa an nou an lò (yò)
la Pwent sé la familia, dé koté familié,
dé bobo dé bos é dé souvenirs par milliers
la Pwent sé on (boug a) bisiklèt, ki sav moli la rèd,
ki ka kontinyé (fòsé ) pédalé menm si monté la rèd
la Pwent sé on plas i ké toujou ni on plas
pou tou lé « martyrs de la liberté »,
lònnè épi respé, sé pa enki, pasé, piyé épi pisé
sé la i ni dé moun ki ka viv, ki ka respiré,
dé moun ki ka viv, fè sa yo pé é resté an pè
la Pwent kisisi, la Pwent kisisa,
la Pwent sé kon si, la Pwent sé kon sa,
la Pwent sé kon sa, sé on konsantré a Gwada